ಪ್ರೀತಿ ಯಾವುದು?

ದೂರ ಬಾನ ಅಂಚಿನಿಂದ
ಮಳೆಯ ಮೋಡ ತೇಲಿ ಬಂದು
ಊರ ತುಂಬ ಹನಿದು ಸುರಿಯೆ
ಅದುವೆ ಪ್ರೀತಿಯು

ಸುರಿದ ಮಳೆಯ ಹನಿಯ ಹೀರಿ
ಭುವಿಯ ಒಡಲ ಬೀಜ ತಾನು
ಒಡೆದು ಮೇಲೆ ಬಂದು ನಗಲು
ಅದುವೆ ಪ್ರೀತಿಯು

ಬಳ್ಳಿಯಾಗಿ ಹಂಬಿ ಹಬ್ಬಿ
ಬೇರು ಆಳಕಿಳಿಸಿಕೊಂಡು
ಮಣ್ಣ ಸತುವ ಹೀರಿ ಬೆಳೆದು
ಅದುವೆ ಪ್ರೀತಿಯು

ಸಾವಿರಾರು ಮೈಲಿನಿಂದ
ಹರಿದು ಬರುವ ರವಿಯ ಕಿರಣ
ಎಲೆಯ ಹಸಿರು ಮಾಡಿಯಾಡಿ
ಅದುವೆ ಪ್ರೀತಿಯು

ಹೂವು ಅರಳಿ ಚಿಟ್ಟೆ ಬರಲು
ಮಧುವ ಹೀರಿ ರಮಿಸುತಿರಲು
ಪರಾಗವಾಗಿ ಕಾಯಿಬಿಡಲು
ಅದುವೆ ಪ್ರೀತಿಯು

ಕಾಯಿ ಬಲಿತು ಬೆಳೆದು ನಿಲ್ಲಲು
ಮನುಜ ಕಿತ್ತು ತಿನ್ನಲು ಅದನು
ಎಸೆದ ಬೀಜ ಮತ್ತೆ
ಭುವಿಯ ಮಣ್ಣ ಸೇರಿತು

ತಾನು ತನ್ನದು ಎನುವ ಮನುಜ
ತನ್ನದಷ್ಟೆ ನೋಡೊ ಮನುಜ
ತನ್ನ ತಾನೆ ಕೇಳ ಬೇಕು
ಪ್ರೀತಿ ಯಾವುದು?

             ಯೋಗೀಶ್ ಮಲ್ಲಿಗೆಮಾಡು

ನೆನಪೋಲೆ

ಮಂಗಳೂರಿನ ಉರಿ ಬಿಸಿಲ ಧಗೆಗೆ ಮಡಿಕೇರಿಯ ಮಂಜಿನ ಹಾಗೆ ನೆನಪಾದೆ

ಬೆಂಗಳೂರಿನ ಟ್ರಾಫೀಕಿನಂತೆ ಎದೆಯಲ್ಲಿ
ಆಗಾಗ ನಿನ್ನ ನೆನಪಿನ ಸಿಗ್ನಲ್ ಬೀಳುತ್ತಿದೆ,

ನಿನ್ನ ಒಂದು ಕುಡಿ ನಗೆಗೆ
ಶಿವಮೊಗ್ಗದ ಜೋಗದಂತೆ ಹೃದಯದಲ್ಲೆಲ್ಲೋ ಜಲಪಾತ,

ನಿನ್ನ ತುಟಿಯ ಸವಿಗೆ
ಧಾರವಾಡ ಪೇಡ, ಬೆಳಗಾವಿಯ ಕುಂದ ಯಾವುದು ಸಾಟಿ.....?

ನನ್ನೆಡೆಗೆ ತಿರುಗಿ ನೋಡಿದರೆ
ನಾನಾಗಲೇ ದಾವಣಗೆರೆಯ ಬೆಣ್ಣೆದೋಸೆಯಂತೆ ಮೃದು,

ಮಂಡ್ಯದ ಸಕ್ಕರೆ ಬೇಕಾಗಿಯೇ ಇಲ್ಲ
ನೀ ಕುಡಿದು ಕೊಟ್ಟ ಚಹಕ್ಕೆ,

ಬಿಜಾಪುರದ ಗೋಲಗುಮ್ಮಟದಂತೆ ನಿನ್ನ ಹೆಸರು ಅನುರಣಿಸುತ್ತಿದೆ,

ನಿನ್ನ ಸಂಭ್ರಮಕ್ಕೆ ಚಿಕ್ಕಮಗಳೂರ ಸೊಬಗಿದೆ

ನನ್ನ ಕಾಯುವಿಕೆಗೆ ಬೀದರದ ಬಿಸಿಲ ಬೇಗೆಯಿದೆ,

ಆದರೆ, ನಮ್ಮಿಬ್ಬರ ಸವಿಕ್ಷಣಗಳು
ಇನ್ನು ಹಂಪಿಯ ಗತವೈಭವದಂತೆ ನೆನಪು ಮಾತ್ರ.

     ಯೋಗೀಶ್ ಮಲ್ಲಿಗೆಮಾಡು