ಹೆಸರಿಡದ ಕವಿತೆಗಳು

ನಡೆಯುತಿರಲಿ ಬದುಕು ಅದರದೇ ಪಾಡಿಗೆ,
ಹೆಜ್ಜೆ ಹಾಕೋಣ ನಾವು ನಮ್ಮದೇ ಹಾಡಿಗೆ.
******************************************
ಕನಸು ಸತ್ತರೆ ಏನಂತೆ,
ಕನಸು ಕಾಣುವ ಮನಸು ಸಾಯದಿರಲಿ.
******************************************
ಕ್ರಮಿಸಿ ಬಂದ ಪಯಣದ ನೆನಪು ಮಾಸಿಲ್ಲ
ನಡೆಯುತಿರುವ ದಾರಿಯಲಿ ಹೂವಿಲ್ಲ ಹಾಡಿಲ್ಲ
ಬರಲಿರುವ ಹಾದಿ ಕನಸಲಷ್ಟೇ ಕಾಣುವ ಕವಿತೆ.
******************************************
ಬಸ್ಸು ಕಾರಿನ ಸಿಡಿಲ ಸದ್ದು
ಸಹಜ ಸಂಜೆಯ ಕೊಂದಿತು
ಹಕ್ಕಿ ಹಾಡಿನ, ಕೆಂಪು ಬಾನಿನ
ಸೊಬಗು ನಗರದಿ ಕುಂದಿತು
******************************************
ಜೀವದೊಳಗಿನ ಶ್ವಾಸ ಬರೀ ಗಾಳಿಯಾಯಿತು
ತುಂಡು ಬಿದಿರೊಳಗಿನ ಉಸಿರು ರಾಗವಾಗಿ ತೇಲಿತು
******************************************
ಮಾಘಿ ಚಳಿಗೆ
ಮೇಘ ಚದುರಲು
ಮೌನವಾಯಿತೆ ಕೋಗಿಲೆ?
******************************************
ಉದಯ ರಾಗವೇ ಮೂಡಿ ಬಂದಿದೆ
ಸೂರ್ಯ ರಶ್ಮಿಯ ತೇರಲಿ
******************************************
ರಾತ್ರಿ ಎಂದರೆ?
ಒಡೆದರಳಲು ಕಾದ ಮುಗುಳಿನ ಅಧರದಲಿ
ಸುಗಂಧ ಬಂಧಿಯಾದ ಘಳಿಗೆ
******************************************
ಮಂಜು ಮುಸುಕಿದ ಮುಂಜಾವಿಗೆ
ಮೌನ ಮಬ್ಬಿನ ಮೆರುಗು
******************************************
ಎಲ್ಲೋ ಕತ್ತಲರಳಿ ಚಂದಿರ ನಕ್ಕ
ಮನೆಯಂಗಳ ಫಳ್ ಎಂದಿತು ಬೆಳದಿಂಗಳಲಿ
******************************************
ಬಿರಿದ ಮಲ್ಲಿಗೆಯ ಘಮ ಹರಡಿತ್ತು
ಕತ್ತಲೆಗೆ ಕತ್ತಲೆಯೇ ಮಲಗಿದ ಹೊತ್ತಲ್ಲಿ
******************************************
ಇರುಳ ತಾಯಿಯ
ಬಿಚ್ಚು ಮುಡಿಯಲ್ಲಿ
ಬಿಡಿ ಮಲ್ಲಿಗೆಯಂತಹ
ತಾರಕೆಗಳು
******************************************
ಮುಳ್ಳು ಬೇಲಿಯ ಮೇಲೆ
ಹಂಬಿ ಹಬ್ಬಿದ ಬಳ್ಳಿಲತೆಯ ತುಂಬಾ
ಬಿರಿದ ರಾತ್ರಿರಾಣಿ

ಯೋಗೀಶ್ ಮಲ್ಲಿಗೆಮಾಡು