ಇರುಳಗಾನ

ನಿನ್ನೂರ ದಾರಿಯಲಿ ದೀಪಗಳೆ ಬೆಳಗಿರಲು
ಹಾಡಾಗಿ ಬರಲಿ ಬೆಳ್ದಿಂಗಳು
ಮಾಘದಲಿ ಬೀಸಿರಲು ಚಳಿಗಾಳಿ ಹಿತವಾಗಿ
ಸಂಧಿಸಲಿ ನಮ್ಮಿಬ್ಬರಾ ಕಂಗಳು

ಬಾಂದಳದ ನಕ್ಷತ್ರ ಬೆಳ್ಳಿನಗೆ ಬೀರುತಿದೆ
ಬಳುಕುತಿದೆ ಗಾಳಿಗೆ ಹೊನ್ನ ದೀಪ
ಘಮಿಸುತಿದೆ ಸಂಪಿಗೆಯ ಅರೆದೆರೆದ ದಳಗಳು
ನಿನ್ನ ಸಿರಿಮುಡಿಯಲ್ಲಿ ಓಲಾಡುತ

ಮನೆಯ ತೋರಣದಲ್ಲಿ ಮಲ್ಲಿಗೆಯ ಹೂಮಾಲೆ
ಹೊಸ್ತಿಲ ಅಂಚಿನಲಿ ಸೇವಂತಿಗೆ
ಮುತ್ತು ಹನಿಗಳ ಮಿಂಚು ಸಂಜೆಯಲಿ ಎಲೆಮೇಲೆ
ಜೇನು ಕಂಠದ ಹಾಡು ಕೋಣೆಯೊಳಗೆ

ಮುಳ್ಳ ಬೇಲಿಯ ಮೇಲೆ ನಕ್ಕ ಹೂವಿನ ಮಿಂಚು ಊರಾಚೆ ಕೆರೆ ಸುತ್ತ ಕಂಪ ಸೂಸಿ,
ಮುಳ್ಳು ಬದುಕಿನ ನಡುವೆ ನನ್ನವಳು ನೀ ನಕ್ಕು
ತೂಗಿ ತೊನೆಯಿತು ಬಾಳು ಗಾಳಿ ಬೀಸಿ

ಯೋಗೀಶ್ ಮಲ್ಲಿಗೆಮಾಡು