ಯಾವ ಕಂಪೆನಿ ಹುಡುಗಿ?

ಎನ್ಫೀಲ್ಡು ಬೈಕಿನಲಿ
ಬೀಸುಗಾಳಿಯ ಹಾಗೆ
ಸದ್ದಿಟ್ಟು ಹೋದವರು ನೀವಲ್ಲವೆ?

ರೇಬೆನ್ನು ಗ್ಲಾಸಿನಲಿ
ನನ್ನೆಡೆಗೆ ತುಸು ನೋಡಿ
ಸಣ್ಣಗೆ ನಕ್ಕವರು
ನೀವಲ್ಲವೆ?

ನಮ್ಮೂರ ಮೇಲಾಸಿ
ನಿಮ್ಮ ಬೈಕೋಡಿರಲು
ಮೂರು ಹಾರ್ನಿಟ್ಟವರು
ನೀವಲ್ಲವೆ?

ನನ್ನ ಮೇಕಪ್ಪಿಗೆ
ತೊಟ್ಟ ಟೈಟ್ಫಿಟ್ಟಿಗೆ
ಮನಸೋತು ಸುಳಿದವರು
ನೀವಲ್ಲವೆ?

ಯಾವ ಐಟಿಯ ಹುಡುಗಿ
ಯಾವ ಕಾಲೇಜ್ ಬೆಡಗಿ
ಎಂದು ತಲೆ ಕೆರೆದವರು
ನೀವಲ್ಲವೆ?

ಅಂದು ಬಸ್ಟ್ಯಾಂಡಿನಲಿ
ನಿಂತಿರಲು ನಾನೆಂತು
ಬೈಕಿನಲಿ ಬಂದವರು
ನೀವಲ್ಲವೆ?

ಬನ್ನಿರಿ ಎಂದವರು
ಕುಳ್ಳಿರಿ ಎಂದವರು
ಡ್ರಾಪ್ ಕೊಡುವೆನೆಂದವರು
ನೀವಲ್ಲವೆ?

ಹತ್ತಿ ಕೂರಲು ನಾನು
ಸೈಡ್ ಮಿರರು ಸರಿ ಮಾಡಿ
ಸಣ್ಣಗೆ ನಕ್ಕವರು
ನೀವಲ್ಲವೆ?

ನನ್ನ ಚೆಲುವಿಗೆ
ನಿಮ್ಮ ರೇಬೆನ್ನು ಹೊಳೆಯಿತು
ಎಕ್ಸಲೇಟರ್ ಕೊಟ್ಟವರು ನೀವಲ್ಲವೆ?

ಎಂ ಎನ್ ಸಿ ಯೋ
ಐಟಿ, ಬಿಟಿ ಕಂಪೆನಿಯೋ
ಎಂದು ಕೇಳ್ದವರು
ನೀವಲ್ಲವೆ?

ಬೀಡಿ ಕಂಪೆನಿಯೆಂದು
ನಾಚಿ ನುಡಿಯಲು ನಾನು
ಬ್ರೇಕೊತ್ತಿ ನಿಂದವರು
ನೀವಲ್ಲವೆ?

ಬೀಡಿ ಬ್ರಾಂಚಿನ ಮುಂದೆ
ನನ್ನ ಬಿಟ್ಟು
ತಿರುಗದೇ ಹೋದವರು
ನೀವಲ್ಲವೆ?

ರೇಬೆನ್ನು ಮಂಕಾಯ್ತು
ಮತ್ತೆ ನಗು ಕಳೆದೋಯ್ತು
ತಿರುಗದೇ ಹೋದವರು
ನೀವಲ್ಲವೆ?

ಯೋಗೀಶ್ ಮಲ್ಲಿಗೆಮಾಡು