ನನ್ನ ಅಮ್ಮ

ಮನೆಯ ಬೇಲಿ ಸಾಲಿನ ಬಳ್ಳಿಗಿಡಗಳ
ಸರಿ ಮಾಡಿದವಳು ನನ್ನಮ್ಮ.

ಅಂಗಳಕ್ಕೆ ಸೆಗಣಿ ಸಾರಿ
ಚೆಂದದ ರಂಗೋಲಿ ಇಟ್ಟವಳು ನನ್ನಮ್ಮ.

ಹೊಸ್ತಿಲಂಚಿಗೆ ಹೂವು, ಮನೆಯ ತೋರಣಕೆ
ಹಸಿರೆಲೆ ಕಟ್ಟಿದವಳು ನನ್ನಮ್ಮ.

ದೀಪ ಮುಡಿಸಿ ಮನೆಯ ಬೆಳಗಿಸಿ
ಮನೆಯಾಗಿಸಿದವಳು ನನ್ನಮ್ಮ.

ಅನ್ನ ಬಸಿದು, ಚಟ್ನಿ ನುರಿದು,
ತುತ್ತು ಉಣಿಸಿದವಳು ನನ್ನಮ್ಮ.

ಮಾಡಿದಷ್ಟೂ ಕೆಲಸ, ಮುಗಿಯಿತೆಂದು
ಉಸ್ ಎನ್ನದವಳು ನನ್ನಮ್ಮ.

ಮನೆಯೆಲ್ಲಾ ಮಲಗಿದರೂ
ಅಡುಗೆ ಮನೆಯ ಪಾತ್ರೆ ಸದ್ದಾಗಿಸುವವಳು ನನ್ನಮ್ಮ.

ಸರಿರಾತ್ರಿವರೆಗೂ ಬೀಡಿ ಸೂಪನಿಟ್ಟು
ಬೀಡಿ ತಿರುಗಿಸಿದವಳು ನನ್ನಮ್ಮ.

ಇಂದು ಮನೆಯಲ್ಲಿ ಅಮ್ಮನ ಕೈಬಳೆಯ ಸದ್ದಿಲ್ಲ,
ಎದೆಯಲ್ಲಿ ಅಮ್ಮ ಹಚ್ಚಿದ ಹಣತೆ ಮಾತ್ರ ಇನ್ನೂ ಬೆಳಗಿದೆ!!

ಯೋಗೀಶ್ ಮಲ್ಲಿಗೆಮಾಡು