ನೀಲ ಮೇಘ ಮತ್ತು ಶ್ಯಾಮ

ಮೇಘ ಸಾಲಿನಲ್ಲಿ ಮತ್ತೆ ನೀಲಿ ಬಣ್ಣ ಬೆರೆತಿದೆ
ನೀಲ ಮೇಘ ಶ್ಯಾಮ ನಿನ್ನ ಹಾಗೆ ಕಂಡು ಬರುತಿದೆ

ದಟ್ಟ ಮುಗಿಲ ಮೇಲೆ ಪುಟ್ಟ ನವಿಲಗರಿಯ ರೂಪವು
ಪುಟ್ಟ ಪಾದದಂಚ ಕೆಳಗೆ ಅಚ್ಚ ಹೊಗೆಯ ಧೂಪವು

ನಿನ್ನ ರೂಪ ಮುಗಿಲ ತುಂಬ ಕೊಳಲ ನುಡಿಸುವಂತಿದೆ
ನೀಲಿ ಬಣ್ಣದೋಕುಳಿಯಲಿ ಜೀವ ತುಂಬಿದಂತಿದೆ

ಕುಸುಮಮಾಲೆ ನೇಯುತಿರುವೆ ಧರಿಸಲೊಮ್ಮೆ ಬಾರೆಯಾ?
ನಿನ್ನ ರಾಧೆ ಇಲ್ಲೆ ಇರುವೆ ಮೊಗವನೊಮ್ಮೆ ತೋರೆಯಾ?

ಬೆಳ್ಳಿ ಬಾನ ಬಯಲಿಗೇಕೆ ನೀಲಿ ಬಣ್ಣ ಲೇಪವು?
ನೀಲವರ್ಣ ನನ್ನ ತೊರೆದೆ ಏಕೆ ಇಂಥ ಶಾಪವು?

ಮೇಘ ಜೀವ ಪಡೆದು ಧರೆಗೆ ಇಳಿಯಬಾರದೇತಕೆ?
ರಾಧೆ ತೊರೆದ ಮೇಘವರ್ಣ ಮರಳಬಾರದೇತಕೆ?

ಯೋಗೀಶ್ ಮಲ್ಲಿಗೆಮಾಡು