ಮಗನ ಪ್ರೀತಿಯನ್ನು ಮನೆಯಲ್ಲಿ ತಿರಸ್ಕರಿಸಲಾಗಿತ್ತು. ಮನೆಯಲ್ಲಿ ನೀರವ ಮೌನ. ಆಕೆ ತನ್ನ ಕೈಯಲ್ಲಿರುವ ಡೈರಿಯಲ್ಲಿನ ಆ ಪುಟವನ್ನೇ ದಿಟ್ಟಿಸುತ್ತಾ ಕೂತಿದ್ದಾಳೆ. ಅದರಲ್ಲಿ ಹೀಗೆಂದು ಬರೆದಿತ್ತು. "ಪ್ರೀತಿಗೆ ಬೇಕಿರುವುದು ಎರಡು ಮನಸ್ಸುಗಳ ಒಪ್ಪಿಗೆ ಮಾತ್ರ. ಪ್ರೀತಿಗೆ ಯಾವ ಬಂಧನಗಳೂ ಇಲ್ಲ."
ಅವಳಿಗೆ ಅವಳ ಪ್ರೀತಿಯ ದಿನಗಳ ನೆನಪಾಯಿತು. ಮನೆಯಲ್ಲಿ ಧರ್ಮ ಜಾತಿಯ ಕಾರಣ ಅವಳ ಪ್ರೀತಿಯನ್ನು ಒಪ್ಪಲಿಲ್ಲ. ಅಪ್ಪ ಬೇರೆ ಹುಡುಗನನ್ನು ನೋಡುವ ತಯಾರಿಯಲ್ಲಿದ್ದರು. ಆಕೆ ಪ್ರೀತಿಸಿದವನೊಂದಿಗೆ ಓಡಿ ಹೋಗಿ ಬದುಕು ಕಟ್ಟಿಕೊಂಡಳು. ಆಗ ಆ ಡೈರಿಯ ಪುಟದಲ್ಲಿ ಹಾಗೆಂದು ಬರೆದಿದ್ದಳು. "ಪ್ರೀತಿಗೆ ಬೇಕಿರುವುದು ಎರಡು ಮನಸ್ಸುಗಳ ಒಪ್ಪಿಗೆ ಮಾತ್ರ. ಪ್ರೀತಿಗೆ ಯಾವ ಬಂಧನಗಳೂ ಇಲ್ಲ."
ಪ್ರೀತಿಸುವವನೊಂದಿಗೆ ಬದುಕು ಕಟ್ಟಿಕೊಂಡ ಆಕೆಗೆ ಒಂದು ಗಂಡು ಮಗುವೂ ಆಯಿತು. ಸುಖಿ ಕುಟುಂಬ. ಕಾಲ ಓಡಿದ್ದೇ ತಿಳಿಯಲಿಲ್ಲ. ಮಗನಿಗೀಗ 25 ವರ್ಷ. ಆತ ಹೆತ್ತವರೆದುರು ಬಂದು ನಿಂತು ತನ್ನ ಪ್ರೀತಿಯ ಬಗ್ಗೆ ಹೇಳಿದ್ದಾನೆ. ಆತನಿಗೆ ತನ್ನ ಗೆಳೆಯನ ಮೇಲೆ ಪ್ರೇಮಾಂಕುರವಾಗಿತ್ತು. ಇಬ್ಬರೂ ಒಬ್ಬರನ್ನೊಬ್ಬರು ಪ್ರೀತಿಸುತ್ತಿದ್ದರು.
ಮನೆಯಲ್ಲಿ ಪ್ರೀತಿಯನ್ನು ನಿರಾಕರಿಸಲಾಯಿತು. ಕಾರಣ ಜಾತಿ ಬೇರೆ ಎನ್ನುವುದಲ್ಲ, ಧರ್ಮ ಬೇರೆ ಎನ್ನುವುದಲ್ಲ, ಲಿಂಗ ಒಂದೇ ಎನ್ನುವುದು!!
ದಿಟ್ಟಿಸುತ್ತಿದ್ದ ಪುಟವನ್ನು ಆಕೆ ಹರಿದು ಹಾಕಿದಳು. ಮಗ ಒಳಗೆ ಕೋಣೆಯಲ್ಲಿ ಕೂತು ಬರೆಯುತ್ತಿದ್ದಾನೆ. "ಪ್ರೀತಿಗೆ ಬೇಕಿರುವುದು ಎರಡು ಮನಸ್ಸುಗಳ ಒಪ್ಪಿಗೆ ಮಾತ್ರ. ಪ್ರೀತಿಗೆ ಯಾವ ಬಂಧನಗಳೂ ಇಲ್ಲ."
ಯೋಗೀಶ್ ಮಲ್ಲಿಗೆಮಾಡು
