ಕರೊನಾವಳಿ

ಎಲ್ಲ ದೀಪವ ತಂದು ಒತ್ತಾಗಿ ಹಚ್ಚಿದರೆ

ದೀಪ ಬೆಳಗುವ ಚೆಂದ ಕಾಣಬಹುದೆ?

ಎಲ್ಲೊ ದೂರದಿ ನಿಂತು ಕಣ್ತುಂಬಿ ನೋಡಿದರೆ

ದೀಪ ಧಗಿಸುವ ಹಾಗೆ ಕಾಣದಿರದೆ?

ದೂರ ದೂರದಲೊಂದು ದೀಪ ದೀಪವ ಹಚ್ಚಿ

ಚೆಲುವ ಸಾಲನು ಹಾಗೆ ನೋಡಬೇಕು.

ಕ್ರೂರ ಕತ್ತಲ ನಡುವೆ ಬಂಗಾರ ಥಳಥಳಿಸಿ

ಬೆಳಕು ಬೆಡಗನು ದೀಪ ನೀಡಬೇಕು.

ದೀಪಗಳ ತೆರದಲ್ಲಿ ನಾವಿಂದು ಸರಿಯುತ್ತ

ಅಂತರವ ಕಾಯುತ್ತ ನಿಲ್ಲಬೇಕು.

ಶಾಪದಂತೆರಗಿರುವ ವೈರಾಣುವಿನ ಮೇಲೆ

ನಿಂತು ದೂರಕೆ ದೂರ ಗೆಲ್ಲಬೇಕು.

ನಮ್ಮ ದೀಪದ ಬೆಳಕು ಮತ್ತೊಬ್ಬನೆದೆ ಬೆಳಕ

ಆರಿಸದೆ ಕಾಯುತ್ತಲಿರಲು ಬೇಕು.

ನಿಮ್ಮ ತನಕಕೆ ನಾನು ಬೆಳಕಷ್ಟೆ ಬೀರುವೆನು

ಬರಿದೆ ನಿಮ್ಮನು ಏಕೆ ಕಾಡಬೇಕು.

ದೀಪಗಳ ಸಾಲಂತೆ ಅಂತರವ ಕಾಯೋಣ

ನಾಶವಾಗಲಿ ಜಗದ ಕರೊನಾವಳಿ.

ಅಪಘಳಿಗೆ ಕಳೆಯಲಿ, ಮನೆ ಮನವ ಬೆಳಗಲಿ

ದೇಶದಲಿ ನಗೆ ತುಂಬಿ ದೀಪಾವಳಿ. 

         ಯೋಗೀಶ್ ಮಲ್ಲಿಗೆಮಾಡು