ಏನ ಮಾಡಲಿ ಹೇಳು

ಎಲ್ಲಿ ತನಕ ನಿನ್ನ ಜೊತೆಗೆ ಹೀಗೆ ನಡೆವುದೊ?

ಯಾವ ದಾರಿ ತಿರುವಿನಲ್ಲಿ ಕವಲು ಒಡೆವುದೊ?

ಬಿಗಿದ ಕೈಯ ಸಡಿಲಗೊಳಿಸಿ,

ಸಾಕು ಇನ್ನು ಎಂದು ಹೇಳಿ,

ಯಾವ ಘಳಿಗೆ, ಯಾವ ಹೊತ್ತು,

ಹೀಗೆ ನೀನು ಹೊರಟು ಬಿಡುವುದೊ?

ಹೊರಟ ಮೇಲೆ ಉಳಿವುದೇನು ನೋಡುತಿರುವುದೊ?

ಕಣ್ಣಿನಲ್ಲಿ ಉಳಿದ ನೋವ ಕೆಡವಿ ಬಿಡುವುದೊ?

ಬಾಳ ಬಯಲ ಪಯಣದಲ್ಲಿ,

ನಿನ್ನ ಜೊತೆಗೆ ನಡೆದ ನೆನಪ,

ಎದೆಯ ಒಳಗೆ ಜತನವಾಗಿ,

ಬಚ್ಚಿ ಇಡುವುದೊ?

ಉಳಿದ ನಾನು ದಾರಿ ನಡುವೆ ಕುಸಿದು ಬಿಡುವುದೊ?

ಮೇಲೆ ಏಳದಂತೆ ಹಾಗೆ ಇದ್ದು ಬಿಡುವುದೊ?

ನಿನ್ನ ದಾರಿ ಕಡೆಗೆ ಮತ್ತೆ,

ಸೋತ ದನಿಯ ಮೌನದಲ್ಲಿ,

ಗಂಟಲುಬ್ಬಿ ಕೈಯ ಬೀಸಿ,

ಮರಳಿ ಬಾ ಎನ್ನುತಿರುವುದೊ?

ಹೂವ ನಿನ್ನ ದಾರಿಗಿಷ್ಟು ಚೆಲ್ಲಿ ಬಿಡುವುದೊ?

ನಿನ್ನ ಪಯಣ ಸುಖವ ಹರಸಿ ಎದ್ದು ನಡೆವುದೊ?

ನಗುತ ನಾನು ದಾರಿ ಅರಸಿ,

ಗಟ್ಟಿ ಮನಸ ಮಾಡಿ ಹಾಡಿ,

ಉಳಿದ ದಾರಿ ಪಯಣವನ್ನು,

ಬಾಳೇ ಹೀಗೆ ಎಂದು ನಡೆಸುತಿರುವುದೊ?